'U friscalettu di spiriti

‘U FRISCALETTU… DI SPIRITI…

Commedia Brillante in Due Atti di

ORAZIO ABBATE

Personaggi:
TIRÈSA CANARIU – Moglie Richiesta;
PIPPINU RICHIESTA – Marito e Fantasma (Spiritu);
GELSA RICHIESTA – Figlia -;
SARINU RICHIESTA – Figlio -;
CALOGGIRU COPPULA - Onorevole e Fantasma (Spiritu);
PANCRAZIU VINDETTA – Onorevole e Fantasma (Spiritu).-

I° ATTO

PIPPINU: finammènti arruvàsti Tirèsa!
No’ sai ch’amu annari a vutàri?
Si fici taddu!
Fozza Sbricamuni!
Pigghiti l’ucchialìni intillittuàli è annàmu!
TIRÈSA: Iò ‘u me’ duvìri ‘i cittatina ‘taliàna ggià ‘u fici!
A’ me’ cruci partitica a ponnu già cuntiggiàri!
Pi’ cciò pigghiattìlli Tù l’ucchialuni da orbu! ….

A mentaccìlla Tu a tò cruci ora!
PIPPINU: Ma disgraziata mugghièri!..
picchi…annàsti senza ‘i mia?
TIRÈSA: Picchì, picchì!
Cusì mi livài ‘u pinzèri!
Ti scuddàsti chi oggi è Dduminica?
Inveci mi mmi rrumpu ‘u coddu ‘i cussa a ffari a mmanciari…
cusì ‘u pozzu fari cu’ me’ comutu!
E ppòi..Tu dummìvi!
O megghiu rrunfàfi comu un pucciddàzzu!
E ppinzài mi non ti rusbigghiu!
PIPPINU: Graazzii p’‘u Tò’ ggintìli pinzèri…. a mugghièri!
Ma non pinzàsti….a cchiddu chi ddopu…
putìunu pinzàri… ‘i mia, ‘i cristiani?
TIRÈSA: Ma a cchi mmalanòva stai pinzànnu
cu’ ‘sti pinzèri…!
PIPPINU: Staiu pinzannu chi…..
quannu iò ora vaiu sulu a vvutàri ‘o seggiu….
‘a ggènti, non vitènnu a bbraccettu…
‘i Pippìnu Richiesta,… ‘i Mìa..
Tirèsa Canariu,.. sò’ mugghièri!...
Chi ppò pinzàri?
TIRÈSA: Chi ppò ppinzàri?
PIPPINU: Penza sicuramenti chi oggi ‘u Canariu…
si iazzòi ch’ ‘u bbeccu stottu …
e, cantànnu…
cci nni dissi quattru a ssò maritu..a mmìa!
Ma cc’è di cchiù!…
‘U Cumpàri chi mmi controlla fora da’ potta du’ seggiu eletturali..
Chi ppò’ pinzàri?
TIRÈSA: Sintèmu a Strautru… chi ppènza puru Chistu fora… da’ seggia …?
PIPPINU: Po’ ppinzàri…chi, nnì sciariàmmu!….
E allùra Tù, pi’ rripìcca,… non vvutàsti comu ti dissi tò’ maritu…
Ma anzi propriu …‘o cuntrariu di unni Iddu t’‘i dissi!

TIRÈSA: E allùra?
PIPPINU: E allùra,…. “ addiu raccumannazioni a ttò figghiu ”!
E addìu puru o travagghiu chi mm’avìa prumittutu chi cci facìa pigghiàri!
TIRÈSA: Chi travagghiu?
Almenu era bbònu? …
E ppòi…aunn’èra?
PIPPINU: Aunn’èra?… Aunn’èra?…
Ora Ti vinni a curiosità…. Disgraziatissima fimmina!
Era unni Don sòla,… ‘u scappàreddu du’ Paìsi…
un postu d’oru!!
E ttù,…. cu’ ‘stà sparàta…“ crucifira sulitaria ”…
fossi ci facìsti peddiri a ttò’ figghiu ‘stu travagghiu ‘i pristiggiu!
To’ figghiu… putìa divintàri Chirurgu conza scappùni…
con specializzazioni in….ghiantèddi ‘i sola d’intra e…
‘ncuddatùra.. ‘i tacchi amputati!
TIRÈSA: Cettu!
Ci fici peddiri ‘stu bbeddu postu!…
Pi’… non parràri poi da’ spicializzazioni….
Ooooooh…chi ccòsa ‘rriàli!
Rifinitura di sgaggiatìni e ttappatùra ‘i buca nte scappìni di fimmini!…
Fossi putìa arruvàri puru a upiràri.. nta sala stirilizzàta..
arrèti o’ bbancùni e ppòi, ch’‘u sàpi….
non dannu limiti a pruvvidenza…
spicializzassi puru…
nto muntaggiu… zzucculàru…
‘i protisi ‘i ferru… p’‘i scecchi!
E ccèttu Pippinu!..Picchì pi’ cchiddi di cavaddi avìa annàri a stutiàri….
all’Univessità ‘Miricàna…nta ‘Merica!
PIPPINU: Si!.. Si! Divettiti!
Pigghia puru p’‘u culu!
Intantu, pi’ scunciuràri occa mmàli pinzèri ‘i me’ Cumpàri…
e mmi non cci ‘mppìzzu… ‘sta bbedda raccumannazioni…
Tu ora veni n’autra vota cu’ mmìa ‘o seggiu unni si vota…

a bbraccèttu, rritènnu…e ccu’ ttutti i denti ‘i fora!
TIRÈSA: Avìa divintatu ribbambinuta!
N’autra vota ddà!
Pippinu!..Mancu si tti strichi ‘nterra!
Chi vvòi mi mmi dicunu a mmìa chi sugnu strammàta?
‘U voi capìri ‘na bbona vota chi Tirèsa Canariu ggià vutòi…?
PIPPINU: E, ccèttu…Pacanìni non rripèti!
E vva bbèni!...Oramài ‘sta Cruci mi calòi supr’‘è spaddi…
Pacenzia Pippinu!
Ma… almenu,… mi voi diri unni vutàsti?
Iò nenti t’‘avìa dittu ancòra?….
TIRÈSA: Unni vutài?
Ma chi ddumanna mi stai facennu Pippìnu?
No’ sai ch’‘u votu è segretu?
PIPPINU: Segretu ntra’ ggenti strana!
Ma Nui maritu e mmugghieri… sèmu!
T’‘u scuddàsti Tirèsa?
Avèmu raggiunàri c’‘a stissa testa!
TIRÈSA: Si ssemu maritu e mmugghieri, voli diri…
chi ssemu…. nu masculu e ‘na fimmina…
pi’ cciò, testi diffirènti…
ognuna chi sò’ pinzèri!
PIPPINU: E ‘a “ cumunioni ” d’i senzi…. unni ‘a menti?…
TIRÈSA: Supra ‘o cumò!..
‘A fotografia cu’ gigliu nte mani…nta stanza ‘i lettu!!…
PIPPINU: Comu non nni sabbàmmu chiù nta ‘sta casa!
TIRÈSA: Penza pi’ Ttìa chiuttostu…non pinzàri all’autri!
PIPPINU: e mmegghiu mi ti lassu pedddiri e….
gghiàmu e’ me’ figghìtti…
‘a canni da’ me’ canni!
Gelsa, Sarinu…unni siti… figghi ‘i vostru Patri!
TIRÈSA: Cettu ‘a matri non si canusci e ‘na…figghia ‘i Butt…!
Uuuh..cala cala, Tiresedda!

PIPPINU: Gelsa…Sarinu!…
Mi vulìti rispunniri,…unni siti?
GELSA: Chi cc’è Papà? Picchì gghiamàti?
Avìti bisognu ‘i mia?
SARINU: Patri?
Picchì ‘sti gghiamàti all’abba!
chi succitìu?
PIPPINU: Scusà pi’ l’orariu Sarinu!
In effetti e…. ssùlu menzionnu!
Autru chi abba…. o bbàbba!
Dunqui, carùsi,… scutàtimi almenu Vui datu….
chi ccu’ vostra matri non cc’è vvèssu!
Oggi chi ssi vota ‘u sapìti Veru?…
SARINU: Cettu ch’‘u sacciu!
E mmi rrumpìstu… ‘u sonnu sulu pi’ cchistu Patri?
Finu a ddumàni cc’è ttantu tempu p’‘annàri a vvutàri!
PIPPINU: Non fari sempri comu a ttò matri Tu!
Scuta e… non curriri avanti!
Gelsa! A figghitta!…
Pi’ ttìa è a…prima vota veru?
GELSA: Veramenti Patri..Iò a me’ prima vota….
mancu m’‘a ricoddu chiù…passòi tantu tempu!
PIPPINU: Ma chi mmalànova capìsti?
Iò parrava ‘i vutaziòni….ma Tù ‘i chi pparràvi?
TIRÈSA: Tò’ figghia vulìa diri chi hannòi tanti voti
‘o seggiu elettorali in cumpagnìa dill’amìci…
chi mmancu si ricodda chiu di quantu voti…visti vutàri!
Veru Gelsuccia ‘a matri!
PIPPINU: Tu, statti muta!
‘A lingua pi’ rispunniri ll’‘àvi to’ figghia!
GELSA: Patri! Propriu Chistu vulìa diri!…
chi ccapistu Vùi?

PIPPINU: E tti parìa chi non era comu dicìa so’ matri!
‘Sta povira Santirillìna chi ancòra gioca c’‘a bbambula….
O sunnu bbambulòtti?…
cu’ ddu cosi ‘i sutta ch’iccimpènnunu ionna e nnotti!
TIRÈSA: Ora basta Pippinu!
“ Subbòlici ” ‘i supra a ‘sti paroli!
PIPPINU: Si è mmegghiu mi cci bbòlu ‘i supra….
‘i ddà supra, tanti cosi…
non si vitunu e mmancu si sentunu!
Dunqui, giuvinuttèddu e giuvinuttèdda, rispunnitimi a ttiru ‘i palla!….
Unnè ch’‘avirrìu ‘ntinzioni ‘i vutàri Vui?
SARINU: Patri? Mi miravigghiu ‘i Vui!
N’‘o’ sapìti ch’ ‘u votu è ccòmu… ‘u Sigrètu ‘i Statu?
PIPPINU: Puru Tu!
Sarinus… Bbrùtus…Figlius Mèi!
Puru Tù mi dasti, … ‘a cutiddàta Cisarìna!…
Non bastava tò matri!
‘U sapìti chi vvi dicu…. “ ittàti sangu tutti quanti ”!
E ttù, Sarinu!... Scodditi puru ‘u bbeddu postu!….
SARINU: Mamma?...Ma di quali postu sta parrànnu ‘u papà!
TIRÈSA: Nenti figghiu!… Alta spicializzazioni scappàra!…
Non facìa pi’ ttìa!
Amuninni! Lassatulu sulu a vostru patri…cusì si sfoca parrànnu!
PIPPINU: Si ! Si ! ..Cupiàti e… scutàti a vostra matri…
chi ppòi vvi truvàti bbònu !

SCENDE LA SERA!
SUL PALCO LUCE SOFFUSA E PEPPINU CHE RIMURGINA IN DISPARTE!
SU UNA SEDIA GIRATA SI SENTE UNA CUPA VOCE

CALOGGIRU: Pippinuuuu!...
Pippìnu Richiestaaaaa…..
PIPPINU: Cu è ! Cu è chi mmi stà gghiamànnu ?

CALOGGIRU: Pippinuuuu!...
Pippìnu Richiestaaaaa…..
PIPPINU: Inzomma cu è !…Facìtivi a vvitiri !
Si è nu schezzu già duròi assài…e no’ mmi stà piacènnu chiù !
CALOGGIRU: Pippìnu Richiestaaaaa…..
Invèci ‘i diri « minchiàti »…vadda bbonuuuu !
Vadda attonnu ‘i Tìiiiiiiiia !
PIPPINU: Santa Lucia ! Matri da’ vista !
iò vitu sulu ‘na seggia e…
nu linzòlu iancu stinnùtu ‘i supra chi….
CALOGGIRU: Chi Ppàrraaaaaa !
Appuntu ! Scimunituuuuuu !…
PIPPINU: Ah ah..aiutu !....Aiutu !
Matri, Nonna …
Tirèsa…
Tirèeeeeesa Aiuuuutu !…. Nu Spiritu spittràaaali !…
Aiutu….sabbàaaatimi !
CALOGGIRU: Ma ‘a voi smettiri ‘i fari bbùci !…
Tantu, si iò non vvogghiu, non ti senti nessunu!…
E a mmìa…mi poi vitiri sulu Tù !
Pi’ cciò smettila ‘i fari ‘u pacciu…
E nò’ gghiamàri a nnuddu !....Chi nnuddu ti senti !
PIPPINU: Tirèeeeeesa Disgraziata ! Aiuuuutu !….
Cc’è ssempri nu stissu Spiritu spittràli davanti ‘i mìa…aiutuuu !
CALOGGIRU: Ora mi facìsti giràri i cincu minuti :
( con la mano puntata verso il sedere)
Pigghia ‘sta fumminàta!..Piiiuuuum….
PIPPINU: Aaaaih !!… Disgraziatu Spiritu!…
‘U me poviru menzu culu destru !….
Comu bbrucia !
CALOGGIRU: cusì nzigni e tti dugni ‘na cammàta !
E ora c’‘a ffàri ? A Voi smettiri? o a ccuntinuàri !

PIPPINU: Ma inzomma, si po’ ssapìri cu malanova siti?
Picchì sciglistu a me’ casa!
CALOGGIRU: Iò sugnu l’Onurevuli Caloggiru Coppula!
Spiritu e Puliticu Fondatori nonchè simpatizzanti sustinituri…
du’ Pattittu ‘i destra “ Risurizzioni e Rinascita ”! ….
Chiddu chi havi pi’ ssimbulu:
‘na Cascia da mottu apètta.. cu’ nu schelitru chi nnèsci, ….
a simbuliggiàri propriu ‘u rritònnu in vvìta ill’anticu amuri…
….Patriu, Patriotticu e Garibbàddinu!
PIPPINU: Patri Nostru e Avi maria …ch’‘immammattìu!
Piacìri Onurevuli Coppula!
Iò sugnu… sulu… Pippinu Richiesta!….
Anonimu Nizzaddu, sbrigafaccenni e ccecca favuritismi vari!
Cosa pozzu fari mi vvi sebbu?
CALOGGIRU: Pippinu!
‘U ddànnu già ‘u facìsti!...O megghiu!....
‘‘U fici già to’ mugghièri!…Datu chi cci desi ‘u so votu…
‘o pattìtu ‘i sinistra!
PIPPINU: ‘Sta disgraziata!.. ‘U sapìa!
Puru ‘i ddòcu si seppi…veru?
CALOGGIRU: L’amici dill’amìci…
ci sunnu a tutti ‘i patti!…
Puru ccà!
E mmi friscàru cu’ me’ pattìtu rischia ‘i peddiri l’elezioni…
p’‘un votu….chiddu appuntu ‘i tò mugghièri!
Pi’ cciò, ora Tocca a Ttìa risistimàri ‘sta situazioni!….
PIPPINU: A mmìa! Ma Iò puvirazzu ‘i mia…chi ccentru!…
CALOGGIRU: Chi è ‘a mèi a mugghieri?
A Tòi è!…
Tu t’‘a sciglìsti cusì scuntrusa e cavaddùsa!
‘A prossima vota ti nni pigghi una… chi tti scùta quannu parri!
A ppropositu viti ch’‘ a risobbiri puru…a situazioni vutazionali di’ to’ figghi!

Cu cchisti…si Vinci, si peddi…o si pareggia!
Occhiu!…. Attentu ‘a patti destra du’ to’ culu….
chi ‘sta vota a ffòcu t’‘a fazzu pigghiari!…
PIPPINU: Ma onurevuli Spiritu chi pozzu fari Iò…
Dammìlla Tu ‘na soluzioni..
sabbimi ‘u d’arrèti si ppòi!
CALOGGIRU: Pi’ non ffàri ddu’ pisi e ddu’ misuri….
ccà ssùpra non mi è cunzintutu dari suluzioni!
‘Na cosa pirò a pozzu fari ed è cchidda…
mi Ti dugnu a gghiavi pi’ sbrugghiàri ‘stà matassa…
tò’ Soggira!
E ora Ti salutu! Chiù ttàddu ni sintèmu!
PIPPINU: Aspetta! Unni vai?
Chi ccentra me’ soggira chi vutazioni!
Chista è mmènza paralitica nto lettu…e pi’ ggiunta…
non raggiuna mancu chiù!
CALOGGIRU: Pippinuuuu….Ti salutuuu!
PIPPINU: Oh poviru Pippinu o…
poviru me’ menzu culu…chi tt’ammattìu !
Penza Pippinu…spremiti ‘u ciriveddu!….
Soggira…Mugghieri…votu!…
Votu… Mugghieri… Soggira!…
Chi ssenzu havi tuttu chistu?
Chi mmi vosi diri Caloggiru Coppula?
San Gnusèppi…dammi ‘na manu!….
Patratennu, chi ccentra me’ Soggira…ch’‘u votu ‘i me’ Mugghièri!
Ma, minchiuna!… Aspetta, aspetta!…Sì!…. Po’ essiri!….
Fossi c’‘iarrivài! Si ddumòi ‘na lampatìna ‘i centu!
Caloggiru Coppula….si’ nu Spiritu gginiàli!
È ora.. mi basta cunvinciri a ddà linguta i tò mugghièri…
E, ssugnu a ppòstu!
Dai Pippineddu, mentiti all’òpira… Ti raccumannu a mmìa stissu ..fài ‘a patti bbòna!

Tiriseddaaa!… Tiriseddaaa bbedda ‘i me’ mugghièri!
TIRÈSA: Chi cc’è? Chi succitìu?
Ti sburiòi a ‘ncazzatìna finammènti!
Ridivintài nautra vota bbedda ‘i me’ maritu?
PIPPINU: Tirèsa ‘u me’ cul…
‘a me’ vita e nte to’ mani!…
Si vvòi mi iò cuntinuu a ccampàri…aiùtimi!
TIRÈSA: Matri, Pippineddu….non mi fari scantàri!
Tu,..‘na picca disgraziatu… sì!
Ma non cusì tantu mi iò vogghiu ‘a to’ motti!
Parra chi Ttì succitìu!
PIPPINU: Succitìu, chi tall’Alti Sferi… sseppuru du’ to’ votu cuntrariu….
e ss’‘a pigghiàru cu’ mmìa…
‘A sintènza è:
o iò cci rricupiru ‘u votu chi ppiddèru ….cu’ Ttìa…
o mi rrustunu vivu… ‘u d’arrèti!….
TIRÈSA: Oh poviru Pippinuzzu…chi gguaiu chi ccumminài!
Oh.. si putirìa ritunnàri arrèti!….
Si cci fussi ‘u motu!…Oh Patratennu fammi ‘stu miraculu…..
Sabba a mmè maritu!
PIPPINU: (Rivolto verso il pubblico) Bbràvu!..Bbràvu Pippineddu!…
Ti darìa ‘na bbaciàta!
CALOGGIRU: (comparso all’improvviso)
Richiesta Pippinu, siti un Geniu!
Ma vaddàti a ‘stà babba paisàna, a ‘sta fimmina… comu si dispèra!
PIPPINU: Onorevoli Coppula…mudiràmu ‘u linguaggiu!
TIRÈSA: (sempre più afflitta) Picchì m’‘a mmudiràri….
Lassimi dispirari e ccianciri ‘u maritu!
CALOGGIRU: Si! Lassila dispirari e ccianciri…a ‘stà ‘nfàmi, disgraziata traditura!
PIPPINU: Ora Basta! Onurevuli! Mi stancàstu!…
Non vi scutu chiù!

CALOGGIRU: Pippinu!
Mi sa …chi hai bisognu ‘i ‘na ripassata!….
Pigghia (Allungando il Braccio) Piiiuuuum….
PIPPINU: Aaaaih !!… Disgraziatu Spiritu!…
N’autra vota…‘U me poviru menzu culu destru !….
Comu mi bbrucia !
PIPPINU: Sig. Coppula!…Onurevuli!….. Schizzàva!
Ti scutu, ti scutu!
TIRÈSA: Ma cu’ ccu stai parrànnu?
Picchi vaddi sempri a dda seggia!
Matri! Pacciu niscìu me’ maritu!
Parra sulu e ssàuta all’aria comu ‘na riddu…. senza motivu!
Pippineddu parra ‘a mugghièri chi tti stà succitennu?
PIPPINU: Nenti Tirèsa!
È ‘u scantu chi haiu ‘i supra non ti priuccupàri!
Vitèmu invèci ‘i risobbiri ‘sta quistioni du’ votu!
TIRÈSA: Pronta sugnu!
Dimmi sulamenti chiddu ch’‘a ffàri Pippinu!
CALOGGIRU: Fozza Pippinu!
Apprufittini ora…chi è… mmànza comu ‘n’agneddu!
PIPPINU: Tirèsa, pi’ risobbiri ‘sta cosa….
Iò avrìa pinzàtu…
‘i fari vutàri a ttò matri!
TIRÈSA: Ma chi stai dicennu?
No’ sai chi mme’ matri si po’ smoviri appena…
e ppàssa chiù ttempu nto lettu….chi ffòra?
E ppòi e ttutta ‘nfasciata da’ testa finu e peti!….
A mmalappèna si vitunu l’occhi!
PIPPINU: Appuntu Tirisedda!
Tu,…. t’infàsci tutta comu a ttò matri!
ti pigghi ‘u so’ cittificatu eletturàli….
e ppòi, facennu finta.. chi ttrascìni ‘i peti…

veni cu’ mmìa ‘o seggiu a vvutàri!
Tirisedda!….
O hai ‘u curaggiu ‘i fari ‘stu coppu ‘i tiàtru…
o ti salutu ‘u maritu!….A Pippinu Tòi!…
‘U capisti?!
CALOGGIRU: Chi Ttiatrìsta, chi bbravu atturi!
Pippinu Tu avirìvi a pigghiàri l’Oscar…
Si, propriu l’Oscar…d’‘imbrugghiùni!
Vadda a dda scimunita…
comu si mmuccòi tutt’‘i cosi!
PIPPINU: Ma Tirèsa? Ti fai diri ‘sti cosi?
Chi ffài?…
quannu non ti cunvèni…
non viti e non zzènti nenti?
Sulu a mmìa mi rispunni?
TIRÈSA: Picchì mi stai dicennu chistu… Pippinu?
Iò ti scutài! Cammiti…cammiti!
Non ti preoccupari…chi mmi cunvincìsti!
Tuttu risubbèmu, annannu a vvutàri!
Stai tranquillu e non svariari c’‘a testa!….
SARINU: Puru iò vegnu cu’ Vvùi Matri!
a ‘stà mè’ nonna….‘na sustinùtedda pi’ non ccàtiri…
cc’ ià vogghiu dari puru Iò!
E ttù, Papà, stai tranquillu, sintìa ogni ccòsa…
e vvòtu puru iò…unni dici Tù!
PIPPINU: Oh luci dill’occhi mei…comu mi sabbàstu ‘a peddi!
Mi raccumannu ‘i non diri nenti a Gelsa….
Chidda è ssàna sana e ‘u putirìa cuntàri in giru!
CALOGGIRU: Chi ffamigghia!…
Chi bbrava ffamigghìa chi ssìti caru Richiesta!
Ora sì!… Chi ssugnu cuntentu!
Cu’ votu ‘i vostra mugghier… ‘i vostra Soggira…

Parìggiu ‘i voti…
Mentri cu’ cchiddu ‘i vostru figghiu e… ppùru ‘u vostru….
‘u me’ pattìtu passa in ttèsta…‘i ddu’ voti!
Bbèni sugnu propriu soddisfattu! Mi nni pozzu annàri ora!
Nni rrivitèmu Pippineddu Richiesta!
PIPPINU: Si!.. ‘u cchiù ttàddu possibili speru!
Fozza figghiulèddi Via tutti quanti….annàmu a vvutàri!

DOPU IL VOTU – SUL PALCO SOLO PEPPINU

PIPPINU: Minchiuna!…Sugnu veramenti soddisfattu!
Tuttu bbònu annòi!
Vutòi… ‘a soggira;
Vutòi.. ‘u Figghiu;
Vutài iò…
Scumparìu ‘u Spiritu pi cciò..’u me menzu culu è ssàbbu!
Ah comu sugnu filìci, finammenti!…
Aiiaaaiih !!… Disgraziata ‘a miseria!…
Chi mmi stà succitennu n’autra vota!
‘U me poviru menzu culu sinistru !….
Comu mi bbrucia !
PANCRAZIU: Pippinuuuu!...
Pippìnu Richiestaaaaa…..
PIPPINU: Chi cc’è ancòra!
picchì mi stài gghiamànnu ?
PANCRAZIU: Pippinuuuu!...
Pippìnu Richiestaaaaa…..
PIPPINU: Inzomma ‘u capìa!
‘U capìa chi ssì Ttù!
Macàri si ‘st’avòta… ccanciàsti menzu latu ‘i culu!
Onorevoli Caloggiru Coppula, ‘iazza ‘u culu ‘i ddà seggia….
e ddimi chiddu chi ccàddu voi ancòra !
PANCRAZIU: Pippìnu Richiestaaaaa…..

Invèci ‘i diri « minchiàti »…comu sempri…
vadda bbonuuuu !…
Vaddimi megghiuuuu !
PIPPINU: Santa Lucia !
Iò vitu sempri … ‘a stissa seggia…
cu’ ssèmpri ‘u solitu linzòlu iancu stinnùtu ‘i supra
CALOGGIRU: Ma non è ‘u stissu ‘u Spirituuuuu!… Ntonturuuuuu!
Picchì, cu ti stà parrànnu è…l’Onurevuli PANCRAZIU Vindettaaaaa…
‘U capisti ….Scimunituuuuuu !…
PIPPINU: Ah ah..aiutu !....Aiutu !
Matri, Nonna …Tirisèdda….
Tirèeeeeesa Aiuuuutu !…. Nautru Spiritu spittràaaali !…
Aiutu….
sabbàaaatimi puru st’avota!
PANCRAZIU: Iò ggià ‘a canusciu ‘a to’ cura…
mi tu non fài bbùci e tti stài mutu.
Pi’ cciò.. ( con la mano puntata verso il sedere)
Pigghia ‘sta fumminàta!..Piiiuuuum….
PIPPINU: Aiiaaaiih !!…Disgraziatu ‘i tò’ patri!
Tirèeeeeesa…Sarinu! Aiuuuutu !….
PANCRAZIU: Vitu chi non ti bbastòi!…
Rripigghia…. Piiiuuuum!….
PIPPINU: Aiiaaaiih !!…Disgraziatu Tu…
e ttutti i Spiriti da’ Tò’ famigghia!…
‘U me menzu culu sinistru !….
A ffòcu pigghiòi!…
Comu mi bbrucia !
Parra disgraziatu!
Chi vvòi… puru Tù, ‘i mìa!
PANCRAZIU: Vindètta!…
Iò l’onurevuli Vindetta….vogghiu … giustizia Vindicativa!
PIPPINU: Pi’ ccàrità,parra e non t’incazzàri…

iò t’‘à dugnu ‘sta cosa chi ccècchi…
basta, sulu…chi mmi dici com’‘a ffàri!
PANCRAZIU: Pippinu!
Unni vutàsti Tù,… to’ figghiu…e ppuru… ttò Soggira….
Iò… ‘u sacciuuuuuu!
PIPPINU: Cettu chi ddoca ssùpra ‘i vuci currunuuuuu!
Minchiùna si ccurrunu! Cc’è ‘na massa ‘i spiùni!
L’affàri sòi…mai! Veru?!…
PANCRAZIU: Picchì Vutàstu contru ‘i mia!
Contru ‘u me’ pattìtu… chiddu chi iò m’invintài!….
Chiddu du’ Rramìttu ‘i Rruvèttu..cu’ ddu’ Muredda Russi ‘Mpizzàti!…
Chiddu chi nnascìu pi’ ssimbuliari ch’‘u manciàri è ssacrificiu e cchi…
prima ‘i llungàri ‘i mani…
s’‘avi a ssòffriri sutànnu e… stari attenti e’ spini..!
PIPPINU: Ma Vuscenza?
Onurevuli, ranni, Fantasmifiru.. Spettru…
Iò sugnu‘nnuccènti!
Chi nni putìa sapìri iò, puvirazzu ‘i mìa ‘i ‘stu cilèsti, muttuariu….
partiticu ‘ntrècciu!
Iò, Bbuttàna da’ miseria…sacciu sulu chi ttuttu cuminciòi cu’….
‘na raccumannazioni ‘i scappàru!
Putìa mai pinzàri chi annàva a ffiniri.. nto celu ‘sta me’ ciccatìna ‘i travagghiu!
Ad ogni modu, tinennu cuntu ch’‘u me’ latu ‘i culu sinistru…
vali, quantu a cchiddu destru……
prontu sugnu!
Truvatimi ‘u modu ‘i risobbiri puru ‘sta vostra quistioni vutaziunali…
e non nni parràmu chiù!…
PANCRAZIU: Pippinu Richiesta!
Tu, ‘u giocu…già ‘u canusci!
Ti pozzu diri sulu un nomi…GELSA…to’ figghia!
Penzici, rifletti bbonu e …ssàllu sfruttàri!

PIPPINU: Ma Onurevuli Vindetta…Vui siti sutta ‘i ddu’ voti…
E ‘u votu ‘i me’ figghia…non vvàli doppiu! Comu fazzu?
PANCRAZIU: Penzici Pippinuuuu!…Riflettiiii!…
Non ffari ‘u bbabbasuniiiii…‘u sintìsti comu bbruciaaaa!
PIPPINU: Matri ‘i tutti ‘i fantasmi spiritàli!….Aiutàtimi!
Gelsa!…Gilsucciaaaaa…
Veni ccà bbedda ‘i papà….
GELSA: Chi cc’è ancòra papà!
Stava annànnu a vvutàri!
PIPPINU: Appuntu ‘a figghìtta veni ccà pprima!
Chi ddici si vvegnu puru iò cu’ Ttìa!
Vadda comu tremu tuttu Gelsa!
GELSA: Ma si hai ‘a frevi? Unni voi annàri?
E mmegghiu chi gghiami ‘a mamma chiuttostu!
PIPPINU: No Gelsa!.. Non ttrèmu p’‘a frevi…
Tremu pi’ nn’autra cosa.. moltu, chiù ‘mputtànti….
e…soprattuttu…moltu chiù ddilicàta e sinzìbbili!
‘U me scantu è mmi tù,…. sbagghi a vvutàri figghìtta !
Picchì, essennu a tò prima vota… putirìa capitàri ‘sta cosa…!
GELSA: Ma chi ddici papà, non cc’è pobblema!
Stai tranquillu chi non sbagghiu,picchì….
macàri si non ti ll’avirrìa a ddiri cusì, ma …
cc’è ‘u me’ zzìtu…chi ssàpi vutàri bbònu…
e iò, annànnu cu’ Iddu a vvutàri…mi sentu sicùra!
PIPPINU: ‘U to’ zitu?…
Tu hai ‘u numiru ddùi?….l’autra testa?….l’autru votu?
Matrìtta! Eccu ‘u lampu ‘i ggeniu chi ssi prisènta…
Eccu ‘a soluzioni e’ me’ suffirènzi bruciacchiati!
Matri, comu sugnu cuntentu ‘i Tia Gelsarella!
GELSA: Grazzìi Papà e,…
a mamma chi ancòra mi dicìa mi non ti dicu nenti!
PIPPINU: To’ matri è bbàbba…cara figghia!

Bbàbba! Facìsti bbèni mi n’‘a scuti!
Iò sugnu cusì cuntentu chi quasi quasi…
Si Vvui ddùi mi facìti un favuri….
c’‘a me’ bbinidiziuni e…cc’‘aneddu ‘i fidanzamentu ‘o ìtitu…
da dumani putiti essiri ufficialmente ufficiali nta me’ casa!….
GELSA: Oh Patrittu bbeddu!
Non spiràva in tanta apittùra!...
Dumannici chiddu chi Vvòi…chi nnùi... Gelsa e….
ISIDÒRU Sciancàtu….. ‘u me’ zitu…
PIPPINU: Piacìri, pi’ quannu ‘u canùsciu…
‘i fari ‘a so’ canuscènza!
GELSA: ‘U facèmu ‘i cussa!
PIPPINU: Grazzìi figghia!…
E allùra ‘i cussa.. vogghiu m’‘annàti avvutàri tutt’‘i ddùi…
‘u pattìtu chi havi pi’ ssimbulu:
‘u Rramìttu ‘i Rruvèttu..cu’ ddu’ Muredda Russi ‘Mpizzàti!…
Mi raccumannu….ricuddativi ‘i muredda!
GELSA: Ma Patri? Non era l’autru ‘u to’ pattitu?….
Cc’iù sintìa diri a’ mamma!
PIPPINU: E ora canciài idea…va bbèni!
Buttàna ‘a miseria!….Mi cci fussi unu…
chi ssi facirìa l’affàri sòi!
GELSA : Va bbèni Papà!…Va bbèni! Non t’‘incazzàri!
Currèmu allùra!…A ddòpu!
PIPPINU: Si!…Si!…Annàti, chi iò, nto frattèmpu, vaiu a ccattàri…
ciùri spampanati e ttòtta!…
Stati attenti a non struppicàri pirò!
PANCRAZIU: Chi ccapolavoru!
Chi vvuppìgna testa!
Cumplimenti Pippinu Richiesta, non pinzàva chi cc’iarrivàvi…
Cu’ tò’ ciriveddu…..
Ma fossi ‘u trònu chi tti potti d’arrèti…t’acùzzòi l’ingegnu, veru?

PIPPINU:Pancraziu Vindetta!.. Stati parrànnu du’ me’ culu !
e cchistu…
datu c’‘ancòra sugnu vivu….
non è…ETERIU…
com’‘o vostru…
Ma è MMATÈRIU…
E, pi’ cciò, si bbrùcia e ssi struppìa… si non staiu attentu!
Dittu chistu… “ Addiu ” puru cu’ Vvùi Caru Onurevuli …..
e, mmi non nni vitèmu chiù…mancu da motti, speru!
PANCRAZIU: Mai diri mai…Pippinuuuuu!
‘I strati du’ celu…sunnu ‘nfinìtiiii!
PIPPINU: Tè, Tèeee…( facendo corna)
Cascatùra ‘i pinni ill’ali…e Bborià ‘i ventu a sbandàri !
È ora…Spiràmu in bbèni! Auguriamu mi non cumpàri puru…
l’Onorevuli Spiritu du’.. Pattitu ‘i Centru…Ci manchirìa sulu Iddu!
non critu chi pputirìa supputtàri| chiù…
‘na fumminàta ntò me’ cintràli.. ddilicàtupostu..
TIRÈSA: Ma nta ‘sta casa havi ‘na picca ‘i tempu chi non si rreggi chiù!
Ma chi è tuttu ‘stu sulitariu parràri Pippinu?
Non è chi hai i spiriti fantasmi ‘i supra e n’‘o sai!
C’‘a gghiamàri ‘u Parrinu cu’ ll’acqua santa?
PIPPINU: Mali,… sugnu sicuru chi non cci ffarìa!
Anchi si ora, cara Tirèsa….
sugnu sicuru chi non cci nnè chiù bisognu!
Fammi un favuri pirò…
non ntrasiri chiù di dda potta all’impruvvisu!…
Haiu ‘u cori chi ppenzu chi non suppòtta chiù…
nessun ccòppu ‘i scantu!
TIRÈSA: Comu divintàsti ddilicàtu!
Quasi quasi..non ti rricanusciu chiù!
PIPPINU: Sciruppattìlli Tù…
ddu bbeddi spìriti ‘o ionnu…

cu’ ttàntu ‘i linzòlu…quasi ianchi…. supra ‘e spaddi….
e, pi’ ggiùnta….
chiù brutti ‘i ‘na cucca!…
TIRÈSA: Chi strani paroli.. Spiriti, fantasmi…
E ppòi, picchì ‘i linzòla.. quasi ianchi!….
PIPPINU: Vulirìa Vitiri a Ttìa Tirèsa…
dopu tanti seculi ch’‘i potti ‘i supra!
TIRÈSA: Hai raggiùni!
Mai ‘na lavàta, ‘na stinnùta.. ‘na stirata!…
Puvirazzi! Cu sapi chi ffètu chi ffannu!
Anzi, a ppropositu ‘i chistu…
havi ‘na para ‘i ionna chi quannu ntrasu nta ‘sta stanza…
Sentu ‘NA PUZZA…comu.. ‘i fugnatura!
PIPPINU: Non mi diri nenti!
Puru iò ‘a sentu…
ll’‘aiu ancòra nto nasu!…
M’ impistàru!
TIRÈSA: Comu t’impistàru?
Ni parri comu si eri prisènti cu’ Cchìsti…
Comu si canuscirìvi!
PIPPINU: Pinzàva chi ll’avìvi capùtu!
Datu chi tti dissi prima chi… mmi nn’‘avìa sciruppàtu ddùi?
TIRÈSA: Chi…ffacìsti?
PIPPINU: Ddùi!..
Fantasmi!…
Sciruppamentu!
TIRÈSA: Comu?
PIPPINU: Nò’…. a ccòmu!
Ccà..nta nostra casa!,,’Ntà ‘sta casa!
E, ppricisamènti supra a ddà seggia!
E, occa vvòta… cu’ Ttìa prisènti!
TIRÈSA: Stai schizzannu…veru Pippineddu?
PIPPINU: Mai statu cusì ssèriu!

TIRÈSA: Ma allùra…Matri da’ Catìna!…
Aiutuuuuu… i spiriti fantasmi spittràliiii nta me’ casa….
Aiutuuuuu Pippinuuuu!
PIPPINU: Tirèsa!…Ma chi ddivintàsti Scimunita!
Picchì stai facènnu ‘sti bbuci?
Pippinu e ccà! Ccà sugnu! Cammiti!
Chi ti mmuzzicòi ‘a tarantula!
TIRÈSA: Ma comu fai a gghiessiri cusì ccàlmu…
dopu chi pparràsti chi motti!
PIPPINU: Sugnu cusì ccàlmu…
picchì cc’è ssempri ‘u peggiu…
Penza si cchisti, invèci ‘i parrari…
ti rrustirìunu ‘u d’arrèti!
TIRÈSA: Oh Matri santissima!…
Mancu cci vogghiu pinzàri!
Cusàpi a bbruciùra e ‘a puzza ‘i bbruscàtu!
PIPPINU: Tirribbili Tirèsa! Tirribbili…e, non vogghiu diri autru!
TIRÈSA: Ma cu erunu?
Picchi catèru du’ celu propriu nta ‘sta casa!
PIPPINU: Picchì, ‘i dda supra…sannu sempri tutt’‘i cosi!
Cumprèsu comu vutàmmu Nui….
‘a prima e ‘a sicùnna vota!
‘A malasotti vosi…
chi ‘sti ddù’ disgraziati Spiriti
erunu ‘i Pattìti divèssi…. e ss’incazzàru!…
TIRÈSA: Pippinu?...non ccrìtu chi dda supra
non pputènnu chiù ggiucàri ‘a schidina,..
ggiocunu…all’elezioni eletturali!….
PIPPINU: Chi vvulìsti diri Tirèsa?
TIRÈSA: Chi ggiocunu a ccu ‘nzetta chiossài nomi ntra cchiddi…
chi ppòi diventànnu Onurevuli e vvannu nto Parlamentu da Capitàli Capitulina!

PIPPINU: Hai raggiuni a mugghièri…
ssunnu tantu ‘ccanìti ‘o ggiòcu…
chi ssi ggiocunu puru…a liggìttima!… ‘I linzòla…
Ma..Tirèsa?...Di unni ti venunu cetti sparàti!
Cettu chi nn’‘hai fantasia a mugghièri!
Ad ogni mmòtu…
cu’ ll’annàri a vvutàri..‘i to figghia Gelsa e ‘u….sò’ zzìtu…
ora tuttu si rrisubbìu!…
E ttutti semu sabbi… da’ testa finu ‘o Cul.. finu ‘e peti!
GELSA: ( Entrando in scena all’improvviso e con forti grida)
Papàaaa!.. Papàaaa… Vvutàmmu!
Tuttu bbònu annòi!
PIPPINU: Aiutu!
Chi stà succitènnu ancòra!
Ti…. Ti…Tirèsa
‘U.. ‘u…cori…aiutu!….
Avìa raggiùni l’Onurevuli Vindetta…. ddu disgraziatu!…
Mai…. diri mai!…
‘I strati…‘i strati ‘nfinìti du celu!…Prima o poi s’incontrunu!
Gelsa!…
M’ammàzzàsti ‘u patri!…
A còccia…chista fù a còccia!…
Salutàmu a ttutta ‘a cumpagnìa!…
Moru !..Staiu murennu !…Murìiia…! ( Caduta sul palco)!

II° ATTO

SUL PALCO PIPPINU – CALOGGIRU E PANCRAZIU
PIPPINU: Disgraziati!
Mancia “ VIVI ” a ttradimèntu!
Non vi bbastòi ‘u pareggiu!
Puru ‘a me’ motti vulìstu!
E ppòi?…picchì semu tutti nta me’ casa!

Ccà, ora chi ppozzu scegliri senza scantu….
a Vvùi non vi vogghiu!
PANCRAZIU: Ma vadda ccà chi bbeddu linzuleddu novu!
C’Animedda ‘i primu pilu!
Caloggiru?... Non ti sembra ‘i canuscillu a cchistu?
CALOGGIRU: Veramenti nu luntanu ricoddu …ll’avirìa!
Ma non era Vivu…prima?
PIPPINU: Bbràvi.. e bbràvi e’ ddu’ Cumpàri..Onurevuli!
E ccusì... dopu chi mmi bruciastu ‘u culu da vivu…
Ora mi vulirìu pigghiàri “ p’‘u culu ”..da mottu!
Ma cc’è un picculu particolari chi ffòssi vvi scuddàstu!
‘U sottoscrittu Spiritu…. Pippinu Richiesta…..
Ora po’ ccacàri fùmmini ….puru Iddu!
PANCRAZIU: Caloggiru!.... Matri Matri!…
Chistu!… nn’animàzza piriculùsa è!
Pippinu!...Vadda comu tremu!
Caloggiru priparamuci a scappàri!…
CALOGGIRU: Ma vadda a Cchistu!
Pancraziu? ‘Stu Spiriteddu è cunvintu….
chi nni sta facènnu scantàri pi’ ddavèru!
Anzi nò!..Cci criti propriu!
Pippineddu Richiesta?..Ti sbrighi a sparari..
‘sta minchiunàta ‘i fummini?….
PANCRAZIU: Pippineddu Richiesta?…
cu’ Ttìa sta parrànnu Caloggiru!…
Spiritu ‘i ddu soddi!..
Spara si hai curaggiu!...
PIPPINU: Pigghia in giru bbèni…
Cu’ pigghia p’‘u culu l’uttimu!….
Iò, pi’ quantu curaggiu avìa dda sutta….
‘u vinnìa a ppìsu!

mentri ccà, nto cèlu…..
Pancraziu Vindetta….pi’ quantu nn’haiu…..
‘u pozzu ricalàri e…. ssèmpri m’innavanza!…
e ora, si non capìsti bbònu!…
A Pigghia!…Sciroppati ‘stà bedda…
curaggiusa fumminàta…(Puntando il braccio)….
Pi…Pii..Piii…
Eeh…ma… ma voi nesciri!
Fummini ‘i Pippinu Richiesta.. saittìa ntall’aria, t’‘u òddinu! nesci! …
Eeeh eeh…ma!….
Minchia!…Non spara!
A Ttìa Caloggiru!..Picchì non mmi spara?
CALOGGIRU: ‘U Tòi No!....Ma chistu Si! …
Richiestèdda!…A pigghiulu…nta ddu postu..e ‘nzigna!…
Piiiuuuum….
PIPPINU: sbagghiàsti! Sbagghiàsti…
non mmi facìsti nenti!
Divintàsti orbu!
Non mi bbrucia! Non mi bbrucia nenti!…
Oh….ma chi mmi stà ssuccitennu? ..
‘U linzolu… ‘u linzolu ‘i sutta…
sta pigghiannu a ffòcu!….
Aiutu!... ‘A me’ “ Truscia ”!
Acqua, tanta acqua! …Stutatimi ‘stu linzòlu!…
Disgraziati!
PANCRAZIU: Ma smettila!
Spiritu ddilittànti e ppi’ rrìtiri!
Ccà acqua non cci nnè bisognu!…
Pi’ stutàri…basta ‘na ciusciata ‘i ciàtu c’‘a bbùcca…
Vadda….. fiiiiuuuu…(soffiando) fattu!…Stutàtu!
‘A vitìsti ddilittànti!
CALOGGIRU: Pippinu!....
Scunchiututu chi non si autru!......

comu prima lizziòni…rricodditi c’ancòra si….
n’apprendista Spiritu!…
E pi’ cciò,senza licenza … i sparacchiàri fummini!
Poi, nta ‘stu postu non cc’è ccànni ‘i bruciàri!…
E Nnui, comu Tù dicìsti ‘na vota quann’‘èri vivu …
semu etèrii…
e nò mmatèrii…!
E pi’ ffinìri …
non ti scuddàri mai..
ch’‘u linzòlu è ssacru!...
Picchì è rròbba du’ Patratennu !.
Iddu ni vistìu ‘i ‘stà manèra!
Pi’ cciò si Ttù ‘u bruci …o t’‘u fai bbruciàri…
e mmègghiu chi rritònni vivu…
picchì, da mottu,…
sunnu cavulàzzi amàri Tòi!
PIPPINU: Mah!.. Era propriu veru quannu ddasùtta…
diciunu ch’‘a camira ‘i Ddiputàti…
pigghiàunu a ttutti!
Compresu puru a ddì nnumàli…di cui non rricoddu ‘u nomi…
ma, annànnu a ‘nduvinàri mi sembra chi erunu……
cani e ppòcci!
Caloggiru e Pancraziu,…. Spiriti illa mal’ùra?...
Datu chi ssiti puru…Onurevuli….
picchì non vvi spiecàti megghiu e pparràti gghiaru?
PANCRAZIU: A’ vogghia mi nni ‘ffènni!..‘U dicèmu Nui quannu n’‘amu a ‘ncazzàri!
Non dipènni cettu ‘i Tìa… Principianti!
E vvà bbèni!…
Voi spiecàtu megghiu ‘sta marèdda?…
Vitèmu s’‘a capìsci!
Pippinu Richiesta ti rinnesti cuntu…
chi ccà non zzèmu nto paratisu…veru?
PIPPINU: Ll’avìa capùtu!..
Vitènnu cetti facci in giru!

PANCRAZIU: Com’‘a Tòi,…. Datu chi è ccà cu’ Nnùi..
O è…un casu dovutu a nu sbagghiu divinu giudiziariu?
PIPPINU: Veramenti…
chi occa Sbagghiu ‘i gioventù ‘u fìci puru Iò….
‘u cunfèssu!
Ma ‘ntinnèmuci…
nenti sbagghi ‘i ll’autru munnu!
Occa cutiddàta ccà… nn’autritta ddà!…
Ma sempri senza mòtti pirò! …
Suli e ssemplici cutiddàti!
D’altrondi ‘o funnu ‘o funnu…
era bbravàzzu comu cristianu…
onestu e ppricìsu!…
‘U Chirurgu mi gghiamàunu!…
Macàri ‘o scuru…. ‘i me’ cutiddàti
Erunu, sempri…. operazioni salutàri e mmai murtàli!
I Bbùca….si putìunu ricuciri subbutu e ssèmpri!…
PANCRAZIU: Caloggiru!
Chistu mi sà chi ffà ppèddiri ‘a pacenzia puru ‘e santi!
Pi’ cciò…ficuriti a mmìa!
Cuntinua Tù ‘u fràti!…Fammi ‘u faùri!
CALOGGIRU: Dunqui, Pippinu!
L’Onorevuli Pancraziu, vulìa diri,….
chi ccà non zzèmu nto Paratisu…
picchì semu.. ‘o Puggatoriu!
Nto postu unni nn’‘amu a ppuggàri ‘i piccàti chi fficimu da vivi!
PIPPINU: ‘O Puggatoriu?
Veramenti pi’ cc’‘àmatòra…
ccà semu nta me’ casa!…
E intra ‘a me’ casa….
si pugga…sulu….
cu vogghiu iò e Ccu piaci a mmìa!
P’irisempiu..Vui non mmi piacìti!

CALOGGIRU: Pippìnu!…..
Ccà semu nta tò “ EX casa ”…
ed è ccòmu si ssarìumu nto puggatoriu!
PIPPINU: ‘A testa mi giriòi!…
Inzomma annàmu ‘a sustanza..
chi ccentra ‘stu linzòlu si ssi bbrucìa!
Chi succèti?
Moru n’autra vota pi’ ccàsu?
PANCRAZIU: Succèti chi oggi si bbrucia ‘u linzòlu,..
dumàni si bbrucia ‘u linzòlu …
appena resti a nùta…
Non ffài in tempu a ddìri matri da’ catìna..
Chi, vvìa Pippinu Richiesta…
‘i cussa ntall’inffènu…e tall’itènna rustitùra!
Naturalmente, ddi dda sutta, ai vogghia chi ppòi fai bbùci….
‘I nta ddu postu.. unni ‘u cufulàru e ssempri ddumàtu…
non si rritònna arrèti!..
‘N’avòta chi ssi ‘ntràsi….
Scumparunu ‘i potti e ‘i gghiavi pi gghiapiri…
e non cci sunnu Santi chi ttènunu di capìddi o ‘i pricàri!
Penza puru Pippinu… chi ppuru a spirànza…
chidda ch’‘avèmu oggi…
e cchi pprima o poi ni cunzènti ‘i passàri du’ puggatoriu ‘o Paradìsu….
s’‘a fà a’ lagga!!...
Pi’ cciò…occhiu ‘o linzòlu Pippinu…!
Cuntrollulu sempri..matìnà, menzionnu e ssìra!
PIPPINU: Bbòtta d’ali ‘i puddicìnu!…
Cari Onurevuli, cu’ ‘sta storia…m’‘a facìstu fari ‘i sutta!…
O megghiu ‘i supra datu chi ssèmu ntall’arìa!
Ma dicìtimi….
Vui c’avìti ‘na para ‘i seculi chi stati ccà…
non cci crìtu ..chi non vi succitìu mai …
chi vvi ddumàru ‘u d’arrèti!

Avanti!.. Cu’ mmìa putìti stari tranquilli!…
M’ ‘u putìti diri!…
Unn’‘è ‘a putiedda unni vinnunu......
‘i linzuledda ‘i contrabbannu!

SI SENTE UN FORTE SUONO DI UN FISCHIETTO
POI UNA CUPA VOCE FUORI DAL PALCO
PIPPINUUUU RICHIESTAAA!….. CHI MMINCHIAT…
….CHI SSÀN PETRU STAI DICENNUUU!

PIPPINU: Matridda bbeddà!…
Cu è chi ssunòi ‘u friscalèttu?
E ddi cu è ‘sta vuci ‘ncazzàta?
PANCRAZIU: E tti ggiucàsti ‘u paratìsu!
Almenu…pi’ prossimi centànni!
Pippinu ristàsti fricàtu da’ to’ lingua!
Chiddu era ‘u friscu du’…friscalettu di Spiriti!
Mentri ‘a vuci….era chidda….
du’ Guaddiànu du’ Patratennu !…
Quannu senti friscàri, macàri si non ssènti ‘a vuci…
voli diri, ch’‘oramài,….
“ ‘a pigghiàsti nta ddu postu ”!
Picchì ogni friscàta…vali centanni ‘i chiù ‘i pena ‘i scuntàri!
Un friscu…centanni…ddu’ frischi dducentanni…
e ccusì di centu in ccentu… finu a quannu ‘nzigni!
Chistu havi l’oddini du’ Patratennu ‘i cuntrullàri…
‘u nostru motu ‘i parràri e ddi fari ‘i Spiritùsi….
aumentànnu o livànnu seculi…
comu i cunti chi ffànnu i Raggiunèri!
PIPPINU: Ma grandissimi figghi ‘i Butt….

SUONO ‘I FRISCALETTU

Oh! Guaddianèddu!..
Non pinzàri n’autra vota mali!
Voggghiu diri, …
Figghi ‘i bbravissimi onesti Matri ‘i Famigghia!…
CALOGGIRU: Troppu taddu Pippinu!…
Caricàmu!….
E ssùnnu dducèntu!
PIPPINU: E ccùppa Vostra!
Tutta Vostra!
Picchì non mm’‘u dicìstu prima…
cusì non dicìa …dda bbabbarìa supr’‘a putìa!..
CALOGGIRU: Picchì chista ti valìa…
comu sicùnna lizzìoni!..Nzìgna!
PIPPINU: E ssì! …
Sulu chi ‘sta lizzìoni d’‘un minùtu…
a ‘ntràsiri e nnèsciri…
Mi custòi dducentanni ‘i puggatoriu!
‘A prossima vota invèci mi vvi ssìca ‘a lingua…
dicitammìli prima ‘sti cosi!
‘U stissu ‘nzignu Iò…
Non sugnu nu Spiritu…completamenti sceccu!
PANCRAZIU: Si tti po’ cunzolàri Caru Richiestedda…
Caloggiru, e ssùtta…. d’‘almènu Cincucentanni!
E ‘i mèi…
è mmegghiu mi non t’‘i dicu….
Si nò…Ti scànti!!
PIPPINU: ‘I Vùi..non mi ‘ntiressa nenti!…
A’ vogghia chi mmi dicìti ‘sti cosi…
iò non mmi cunzòlu ‘u stissu!
Pi’ mmìa fù… e rrèsta… ‘na doppia siculari carugnàta!

ENTRANO IN SCENA PIANGENDO ANCHE TIRÈSA – GELSA E SARINU

TIRÈSA: Pippinuuuu! Pippinuzzu ‘i to’ mugghièri!
Picchì m’abbannunàsti!
Straggiu mi hai comu sugnu china ‘i scuramèntu..
comu sugnu Scuramintàta!
PANCRAZIU: Oh!... vadda ccà cu’ si viti?
Pippinu!...Cc’è ttò’ mugghièri!
PIPPINU: E allùra?
Stai attentu a ccòmu parri!
Viti ch’‘u linzòlu ti llòddu!
GELSA: Papàaa!
Poviru disgraziatu!...
Non avìsti ‘u tempu ‘i canusciri ‘u me’ zzìtu!
Chi tristìzza!...Chi scunfuttamentu!
Chi ppèna chi haiu nto cori!
CALOGGIRU: Pigghia pigghia puru a ‘st’autra!
Chi bbedda lingua chi havi!
Pippinu Chista è … ‘a Richiestina Veru?
PIPPINU: Vitèmu e ssintèmu… quannu ‘a smittìti!
‘A vostra è ttutta ‘nvidia!
‘U sacciu chi Vvùi ddùi eru scapuli!
Ccà, nto celu,… i cuttigghiamènti currunu!
PANCRAZIU: Si! ‘Nnvidìa!
Finu a ora t’‘a scippàtu ‘na bbòtta …
‘i straggiu e… ‘i poviru disgraziatu…
scutàmu all’uttimu ggioèllu…da’ lista Richiesta!
PIPPINU: Chi vvulìti diri?
Me’ figghiu stravitìa pi’ ssò patri!
‘Stu masculu è ‘a giusta simènza da’ razza Richiesta…
Un Cugnòmi… ‘na garanzia!
Scutàtilu e ppòi priparativi a ffàri pinitènza!
CALOGGIRU: Pinitènza?
Non ti muntàri ‘a testa Pippinu Richiesta…NON SÌ’…. ‘U SIGNURI!

Sintèmu a ttò’ figghiu chiuttostu a… ‘stu Masculu!
SARINU: Matri!
Smittìtila ‘i cianciai!…Ora ccà cci sugnu iò!…
Me’ Patri murìu scantàtu, comu nu bbàbbu scunchiututu!..
Ma iò,…. chi nni pigghiài tuttu ‘i Vui…
Vi fazzu vitiri, a ttìa e a mme’ soru chi bbedda vita vvi fazzu fari ora…!
Pi’ cuminciàri,…fozza, priparativi…
chi vvi pottu a Ttaummìna…..
a ppassiàri nto viàli di turisti Gemmanici e Furistèri!
a facci ‘i me’ patri…chi non vi puttòi mai!
E ccusì cci dugnu puru ‘na sgrippàta ‘e pistùni i ddu’ mutùri da’ cincucentu!…
Me’ patri chi ccaminàva sempri comu si ffacìa scola quita….
c’‘a prima e ccà sicunna…
e cchiossài ‘i quaranta non ci fici fari mai…
‘u ‘nglippòi!
Assumigghia chiù a un motorìnu c’‘a ‘na machina…!
PANCRAZIU: Senti senti!
E scuta all’uttimu!
E scuta a simènza da’ giusta razza!...
Chistu si,… chi è pparràri gghiaru!
Critu propriu chi ‘stu carusu …
ni pigghiòi veramenti….. tuttu ‘i so’ matri!
PIPPINU: Caloggiru!
Ma si ppropriu sicuru…chi iò, ancòra non pozzu sparàri fummini?
Quannu finisci ‘stu tirociniu?
CALOGGIRU: Ma picchì ti vinni propriu ora ‘sta valìa d’‘annàri a ccaccia?
PIPPINU: Picchì appena haiu ‘a scupètta carica…
pi’ vvìtiri si ssàcciu sparàri….
‘a vogghiu pruvàri subbutu …..
supr’‘o culu ‘i me figghiu ‘i ‘stù.. tradituri da’ so’ razza!
PANCRAZIU: Si! Pippinu!... Hai raggiùni!..Tradituri:
‘I Tìa. ‘i tò Patri… ‘i tò Nonnu e…‘i tutta ‘a tò’ settima ginirazioni!

PIPPINU: Ti divètti ‘sta cosa…veru Pancraziu?
Rrìti.. Rriti!
Intantu Tù, pi’ no’ sbagghiàri…..
No’ hai figghi;
Nò’ hai mugghièri;
e ssi occatùnu t’interruca, pigghi…. zeru in Ginirazioni!….
Pi’ cciò, è mmegghiu chi smetti ‘i rrìtiri….
Picchì oltri a ttìa…non rrèsta.. ch’‘un linzòlu!
TIRÈSA: Figghiòli?
‘U sintìti puru vui ‘sta fètu ‘i fugnatura?
Mi ricodda ‘na puzza canusciùta!
‘U vostru poviru Patri mi cuntòi di ddu’ spiriti cu’ linzòlu tuttu loddu!
Vulìti vìtiri chi ‘sti ddu’ disgraziati sunnu nta ‘sta stanza?
Chi hannu puru ‘u curaggiu mi si fannu vìtiri propriu nta casa ill’omicidiu?
Gelsa, a pigghimi a scupa cu’ bbeddu manicu rossu!
Vitèmu si oltri a spaccàri l’arìa…
pozzu spaccàri occa autra cosa ‘i chiù Spiritàta!
PIPPINU:Chista si chi è bbella!
Me’ mugghièri è un ccàni ‘i caccia…
A vogghia chi ssìti ‘nvisibili e scappàti…
‘u fètu ‘i fugnatura vvi frèca e, u’ sò nasu è ccòmu nu rradar!
SARINU: Pozzu fari occa ccosa iò Matri?
TIRÈSA: Si. ..Sarinu ‘a Matri!…‘Nchiuti ‘a potta c’‘a gghiàvi e…
mmèntici ‘u palìttu ‘i ferru… e ppuru ‘u satizzòttu ‘i sutta ‘a spangàzza!
Mancu l’aria havi a pputìri nnesciri ‘i ccà intra!
CALOGGIRU: Pancraziu!
Chista ‘a testa no’ nnà pò’ spaccàri…
ma ‘na strazzàta ‘o linzòlu n’‘a pò ssèmpri dari!
Pi’ cciò siccòmu..cu si vaddòi si sabbòi!…
Chi nni penzi si nn’‘annàmu a sbulazzuni…. e nni dàmu ‘na lavata?
PANCRAZIU: Ti scuddàsti chi ccà, nto Puggatoriu, non cc’è acqua…..
e ppuru pi’ stutàri ‘u focu si ciuscia?

CALOGGIRU: Non mi scuddài! ‘U sacciu!…
Iò non dicìa nto Puggatoriu ma …
Nta occa cciumàra ‘i passàggiu china d’acqua …
un ttùfficeddu e…
risubbèmu d’ ‘un ccòppu ‘sta puzzulenti scìa fitàli chi llassàmu!!
GELSA: Matri! Fozza! Quannu si comincia!
Ccà cc’è ‘a scupa!
Fatti onùri e…. Rrùmpici l’ossa!
TIRÈSA: Ccà, ccà sentu fètu!….Matri chi ppùzza!
(dando colpi di scopa in aria)….
Tè… Malanova ‘i spiriti fitènti… pigghiàti!!
PIPPINU: Fozza Tirèsa…Caricaaaa!
PANCRAZIU: Caloggiru!
Havìvi raggiùni Tù!
Megghiu un ttùffu nta prima ciumàra ch’‘incuntràmu!
Chista senti ‘u fètu…peggiu di un ccàni sicùggiu!
Minchiùna ! (Colpo di fischietto)
chi nnàsu finu chi havi!
PIPPINU: Bbravu Mastru Guaddiànu!
Fozza ancòra !… Sòna!..
Caricàmu un siculèddu nto cuntu… ‘i Pancraziu!
CALOGGIRU: Ma picchì ‘u patratennu ni uddinòi ‘i non sparàri fummini…
e’ fimmini… nta ddu postu..?…
Quasi quasi…‘na sula bbutticedda cc’‘ià dugnu!…
Pancraziu mentiti davanti…mmùccimi ‘u brazzu..
Cusì…’spetta un mumèntu…cci sugnu…e…
(Prolungato ed insistente fischio)
PIPPINU: A scìppa caloggiru!
‘Stu friscu vali nu doppiu seculu!…Eeeh..eeeh…cusì ‘nzigni!
PANCRAZIU: Pi’ ttutti i diavoli ill’infènnu…
‘Stu Quaddiànu havi l’occhi puru d’arrèti all’àli!

CALOGGIRU: Spiùni!
Tù fusti,… chi ffàcìsti ‘a spia!
PIPPINU: Caloggiru o ‘Rrilòggiu?…
Ti scuddàsti chi cchidda è…mme’ mugghièri!
Chidda non si tocca mancu ch’‘i pinzèri…figurativi cu’ ‘na fumminàta?!
GELSA: Mamma, mi sembra di sentiri ‘na picca ‘i puzza puru iò!…
Fammi capìri…oltri a cchidda ‘i fugnatura…
c’‘assumigghia puru a cchidda ‘i piscistoccu scaffitùtu!
TIRÈSA: Dipènni tuttu du’ nasu…figghìtta!
Oddiu, ora chi mmi fài naschiàri megghiu… putirìa puru essiri…
Fossi cu’ ‘na prifirenza in chiù versu… ‘u bbaccalàru scaffitutu…
nò’ ‘u piscistoccu!
SARINU: Allùra ‘u stài sintennu puru iò!
Me’ soru m’avìa fattu cunfunniri cu’ piscistoccu…
‘stu fètu è propriu com’‘o ‘ bbaccàlàru fitènti.. chi ccattàva ‘u papà!
PIPPINU: E Ttònna?
Ma allùra Chistu ll’àvi cu’ mmìa?
Veramenti tuttu fora razza nisciù!
TIRÈSA: Fozza figghi!…Iò c’‘a scupa e Vvùi..
a ccòppu ‘i scappa!
Spaccamùci ‘a testa a ‘stì fitènti!
Tinìti….
chistu da’ patti ‘i ‘na povera veduva!…
CALOGGIRU: Scappa Pancraziu…mentiti ‘i latu!
PANCRAZIU: Scanziti Caloggiru… non ti mentiri nto menzu ‘i peti!
GELSA: Pigghiàti Spiriti….
‘ssassìni ‘i me’ patri!….
CALOGGIRU: Pancraziu! Dammi ‘na manu…
mèntiti avanti ‘i mia!
PANCRAZIU: Ma chi ssi lluccùtu!…
‘A peddi e ppèddi…e ‘u linzòlu è llinzòlu!…
Ognunu penza p’‘a so’ idda… e pp’‘u so’ iddu!…

PIPPINU: Eccu chi ssi rumpìu l’allianza spiritàli!
‘St’onorevuli non sunnu chiù… ‘i ddù’ Muschittèri ….
Si Spappagghiàru i numira!
ddùi pi’ unu…ora fà unu e… unu cchiù unu …fa ssèmpri unu!
SARINU: Ccà Mamma!…Ccà cc’è ancòra fètu!…
Tè…pigghiàti ‘sta scappàta … spiriti ariùsi e smatiriàli!
TIRÈSA: Fozza figghi!…Facìtici pacàri cara a motti ‘i vostru patri!
PIPPINU: Bbràvi! Complimenti a ttutti!
Chista sì chi è ‘na vera famigghia ‘ncazzàta!…
Pirò…e mmègghiu mi mmi mentu ‘i cantu….
Non si sàpi mai…po’ vvulàri ‘na scappata a ccàsu!
CALOGGIRU: Curri Pancraziu, curri!
PANCRAZIU: Caloggiru!
Ccà cunvèni veramenti truvàri ‘u primu ciumi cu’ ll’acqua! ….
Prima ni livàmu ‘stu fètu traditori ‘i supra…megghiu è!
CALOGGIRU: Mi cunvincìsti Pancraziu!
Via chiù vvelòci da’ luci!

ESCONO DI SCENA CALOGGERU E PANCRAZIU

SARINU: Mamma! Staiu Sbagghiànnu?
O non cc’è cchiù ppùzza!
GELSA: Havi raggiùni me’ frati Matri!…..
Mancu iò ni sentu!
TIRÈSA: Non Vi stàti sbagghiannu figghi!
Non cc’è cchiù ffètu picchì…
S’‘innannàru ‘sti disgraziati Spiriti!
PIPPINU: Minchiùna chi nnàsi fini!
S’‘u sapìa prima…
invèci ‘i spenniri soddi ccattànnu cani ‘i càccia…
mi putìa puttàri d’arrèti ‘a me’ sacra famigghia….

TIRÈSA: Figghi! ‘Sta ritirata strateggica ‘i ddì fitènti…
mi fa ppinzàri…
Chi ffòssi ….cci spattèmmu a scrima nta testa!
Ma ccà s’‘u cori non mmi stà pigghiannu in giru,…
cc’è ancòra occatùnu!…
E cchìstu non po’ essiri autru….chi vostru patri!
‘U me’ Pippineddu chi havènnu ‘u linzulèddu novu novu….
non fà.. nissùna cuccìtta ‘i fètu!
PIPPINU: Chi ffimmina d’oru c’‘avìa accantu… chi mmugghièri!
TIRÈSA: Sarinu, Gelsa…lassàtimi sula cu’ vostru patri!
Ancòra ‘u sentu friscu friscu…
e ccu sàpi si ‘stu zzuccaràtu…non trova ‘u motu mi mmi cunzòla….
aaah…oh Pippinu…
GELSA: Ti lassàmu sula Matri, comu voi!
SARINU: Basta mi non ti scunfòtti ‘u cori Mamma!…
Non ffàri a bbàbba!
Penza a cincucèntu, a Ttaummìna… a passiàta nto viali!
TIRÈSA: Stai tranquillu figghiu!…
‘U sacciu c’‘a vita cuntinua!….
E ppòi, cci siti Vui ‘a matri e….
mmà ffàri fotti pi’ ffòzza!

LASCIANO IL PALCO GELSA E SARINU

PIPPINU: (Parlando vicino all’orecchio) Tirèsaaaa…
Tirèsaaaaaa….assèttiti e nchiuti l’occhiiiii!
Pippinu sugnu…. ‘u tò Pippinuuuu!
TIRÈSA: Pippinu sentu chi mmi stài gghiamànnu…
Ti sentu…uuuh comu ti sentu!
E, oooh…Matritta chi ssònnu chi mmi vinni!…
Megghiu chi mmi ppoggiu c’‘a testa supra ‘o tàulu!
PIPPINU: Tirèsaaaa ‘u tò Pippinu ti stà pparrànnu…scutaaaaa!

TIRÈSA: Parraaaa!….Non sugnu suddaaaaaa!
PIPPINU: Menu maliiiiii e allùra…riscutaaaaa!
Iò sugnu nto Puggatoriuuuu….
E ccà…comu mi cunfitaru, ‘i soliti lingui ‘nfummàti…..
senza raccumannazìoni… com’‘a ddòca sutta…
non si và avanti!….
Nenti Paratisu pi’ Pippineddu Tòiiiii!….
TIRÈSA: Parra gghiaruuuuu!…Chi Vvòi chi ffàzzu!
Cciù dicu all’onurevuli Strunzittu!…Vaiu unni Idduuuu!
PIPPINU: No!…Megghiu chi vvài unni ‘u parrinuuuuu!
Raccumannimi a Idduuuuuu!
Fammi diri missi…tanti missiiiiii e,….
si ssùnnu cantati è mmegghiuuuu!
Tirèsaaaaa….
TIRÈSA: Chi Vvòi ancòraaaaaa!….
PIPPINU: Fatti dari puru l’indirizzu du’ Vescuvuuuuu….
E vvàcci a pparràriiiii!….
Chistu…. po’ arrivàri ‘O PAPAAAAA…
E ‘U PAPA…. CU’ SAN PETRU …su’ ttutta ‘na cosaaaa!…..
Si cchistu voli iò nto Paratìsu cci vaiu puru senza l’àli…
e ‘i cussaaaaa!
TIRÈSA: Capìaaaaa!…
Capiaaaa tutt’‘i cosi!
Ccà finìu… chi invèci ‘i essiri cunzulàta…
T’‘appi a cunzulàri Iò a Ttìaaaa!
Voli diri chi ddòpu chi pparru c’‘u Vescuvu…
Iò mi cunzòlu sula e ssenza figghi…
Annànnu a Ttaummìna! …
Pippineddu Richiesta!…Non ssàcciu si mmi spiecàiiiiii…!
PIPPINU: Tirèsa!….Non ffàri Bbabbarìiiii!
Ccà supra, macàri si non si vitunu…
‘u stissu pisunu i connaaaa!

TIRÈSA: Tantu piacìriiiii!
E ora vistu chi mmi dasti tantu travagghiu….
Parrinu …Vescuvu…e PPàpa….
Ti salutuuuu e mmi rusbigghiuuu…. ni sintèmu quannu arrivi nto Paratìsuuuu!
PIPPINU: Si! A Mugghièri!….
Appena arrivu …Ti fazzu un ccòppu ‘i telefunuuuu!…
Pirò mentimi occa ddu’ gettoni supra ‘a cascia nto campusàntuuuu…
Non sacciu quantu custunu l’interubbàni nto Paratisuuuu!
TIRÈSA: Puru chistiiii…non bastàunu ‘i raccumannazioniii!
Voli diri chi ppì’ Ttaummìna….mi fazzu l’abbonamentuuuuu!
Matri! Quantu dummìa e ppuru quantu parrài..
Haiu ‘a bbùcca sicca!…
Gelsa, sarìnu….vinìti ccà unni vostra matri!
GELSA: Oh Matritta bedda!…
Comu annòi l’incontru cu’ papà!
TIRÈSA: ‘Na cannunàta!
Comu quann’èra vivu…s’‘a fà ssèmpri….
ciccànnu raccumannazioni!
SARINU: E quannu mai cancia me’ Patri!
Mancu ‘a motti cci pòti!
A mmìa, tramiti ‘na ranni raccumannazioni….
mi vulìa fari fari… ‘U Scappàru!
Ma, a ppropositu?…
Chi ebbi a faccia tosta mi ti fà cciccàri…
‘na raccumannazioni pi’ ritunnàri vivu?
TIRÈSA: Sarinu, non essiri ‘ntrunàtu!….
‘Sta raccumannazioni ‘a po’ ddàri sulu… ‘u Patratennu!
Nò.. ‘u figghìttu!
Iddu si cuntintòi sulu du’ Papa….e ddù’ Paratisu !
SARINU: Dicìsti nenti!…
A gghiamulu fissa!

GELSA: ..( piangendo)…Ma chistu voli diri chi mmè Patri e nto Puggatoriu….
chi ssi stà puggànnu puviràzzu!
SARINU: Si quann’èra vivu …‘stu puvirazzu….
m’‘avìssi ccattàtu ‘na biciclettedda, ‘na lambrittedda o…
‘na rruttàmedda ‘i machina qualunqui …
a ‘stùra,….. p’‘i quanti prichèri c’‘iavìssi dittu….
era nto Paratisu!…
GELSA: Ma chi ddici ‘u frati…
‘a biciclettedda,…‘a lambrittedda …‘a machinedda….
Avìa ‘rruvàtu ‘u scattru!
Ma s’‘a mmìa non mi ccattòi mai…
mancu …nu mmòstru ‘i bbambuledda ‘i pezza!
C’‘avirrìa a ddiri allùra…
Pirò iò, a diffirenza ‘i Tìa… non cci pottu rancùri!….
‘U stissu cc’‘indirizzu
ddu’ Gloria e PPàtri …
e ddu’….Patri Nostru…
‘i tantu in tantu!
SARINU: Bbrava Bbrava… ‘ndirizza ‘ndirizza!…
Cusì quannu mori…Ti fannu “ Santa ”!
TIRÈSA: Sarinu?
Potta rispettu a ttò Patri!
Macàri si mmurìu…
e ssi iò, va a ffinìri, chi vvàiu a ttaummìna…..
‘u stissu è pprisènti nta ‘sta casa!
Anzi, s’‘u Vòi sapìri?..
Staiu ‘spittannu propriu ‘na tilifunàta di Iddu!
Pi cciò stai attentu, picchì Tu no’ vìti, ma Iddu…
Ti vìti…Ti scùta… è ssi vvòli, ti fa bballàri senza sonu!

RITORNANO SUL PALCO – CALOGGERU – PANCRAZIU E PIPPINU

PIPPINU: Ma è possibili chi unni vaiu iò….
Cci siti puru vui chi mm’‘avìti a ccurriri d’arrèti?
Vi scuddàstu chiddu chi vvi succitìu nta ‘sta casa ddu’ misi fà?
Vaddàti ccà! Di novu tutta a sacra famigghia inzèmi cc’è!
Scupa e scàppi a pputtàta….
di mani… e ddi pèti!
PANCRAZIU: Bbònu parràsti!
Ma ‘sta vòta non ci sunnu nasi ‘i cani… chi nnaschìunu!
Pippinu Richiesta? Non Ti sembra stranu….
chi ancòra non ssèntutu ‘u nostru fètu?
PIPPINU: Ora chi mm’‘u facìstu nutàri,…. è vvèru!
Comu mai non vi ciaurìunu comu l’autra vota!
CALOGGIRU: Pippinu!..Chi ssì òbbu!
Non stai vitènnu i nostri linzuleddi ianchi ianchi!…
N’‘i fìcimu ddu’ tufficèddi nta ciumàra ‘i Nizza! …
L’acqua pi’ ddìri ‘a verità era friddicedda e….
cci mancòi picca mi ni spaccàumu puru ‘a testa…m’‘a pirò funzionòi!
Semu puliti e ‘mmaculàti a ppròva…. ‘i nasu Tirisìnu!
CALOGGIRU: A ppropositu Pippinu…
nto Puggatoriu girunu vuci supra ‘i Tìa!
PIPPINU: ‘I soliti malilingui veru?
PANCRAZIU: No!Sulu vuci ricercatorii!
PIPPINU: Spiegativi megghiu!
PANCRAZIU: Sembra chi stannu pigghiànnu…
‘nfummazzioni supr’‘i Tìa! E cchi bbòtta d’infummazioni!…
‘A Richiesta vinni ‘i Iàutùni…. ‘i tantu Iàutu!
PIPPINU: Ma mannaia ‘i quannu ma ddànnu!
Non bastàunu ‘i spiùni, ora…puru….
‘u Kappaggibbì avèmu nta ‘stu postu?
CALOGGIRU:Ma Picchì Ti stài ‘ncazzànnu Pippinu?
Facìsti occa ccòsa ‘i mali?

PIPPINU: Iò sugnu ‘mmaculàtu comu… a ‘stu linzòlu!
Iò non haiu nènti… ‘i mmucciàri!
PANCRAZIU: E allùra…penza ‘a salùti!
PIPPINU: ‘I quali salùti stai parrànnu?…
Chi esìsti ccà, ….‘na salùti muttuària fossi?
Cc’‘a si campa d’aria e..ssèmu ntall’arìa!
Non si mancia, non si bbìvi, non ssi dommi…
e ffòssi, si mmàncu vv’innaccuggìstu,….mancu si rispìra!…
Motti semu!….Propriu motti!
CALOGGIRU: Chi bbrùtta notizia chi mmi dasti Pippinu!
In tanti seculi…ancòra non ci havìa pinzàtu!
Ma picchì m’‘u dicìsti!…
Ora mi staiu sintènnu mali!
PANCRAZIU: ‘Stai attentu chi mmòri ‘n’autra vota allùra!….Cretìnu!
CALOGGIRU: Puru Tù ti menti ora…
non basta ‘u mè’ dulùri p’‘a firàli nutizia da’ me’ motti!
PANCRAZIU: Oh,.. ma allùra…Chistu ‘sta pparrànnu pi’ ddavèru!
E ppropriu Scimunitu tunnu!
PIPPINU: ‘A vulìti smettiri ora tutt’‘i ddùi!
Ccà stamu Sautànnu,comu si dicìa dda sutta… ‘i pala in frasca!
Pi’ cciò…ritunnàmu a cchiddu chi mmi dicìstu all’iniziu…
all’infummazzioni supra ‘i mìa!
Cu è ddu spiritu libburu e ccusì…gghiàutu e pputènti….
chi stà cciccànnu pitticuliamènti supr’‘a Pippinu Richiesta!
Fozza, parràti, picchì ‘stu sigretu ‘i puddicenedda…
sulu iò n’‘o sapìa!….
Tutti ‘u sapìunu …tranni l’intirissatu!
PANCRAZIU: Pippinu, cci dispiaci ma…’stu nomi è…
Tòppi sigrètti….non si po’ ddìri!
PIPPINU: Si! Pancraziu..Troppu sicarètti…e Vvi ffuàstu ‘ch’ ‘u fumu!
Ma vulìti smettiri? Chi divintòi ‘stu puggatoriu?…
‘u postu di trì scimmii…non vvìtu, non ssèntu e …non ppàrru!

Fozza! Niscèmu ‘a vuci!
Tra di Nùi…nn’‘amu a ccumpatìri!…
Semu Tutti..
supra ‘u stissu celu!
CALOGGIRU: Pippineddu nò’ ‘nsìstiri…
Nò’ putèmu diri ‘stu nomi !
È ‘na ficura troppu iàuta…Troppu putènti!
Avèmu ‘u divietu assulutu!
PIPPINU: E ccu è, … ‘U Patratennu fossi?
CALOGGIRU: Avìa ‘rruvàtu….
‘u PAPA ‘i Rròma chi ssi…scumutàva ‘u Patratennu!
PANCRAZIU: Pippinu?
Ma cu ti criti di essiri?
Nò vvìti cu to’ linzòlu è cchiddu d’un ssuddàtu semplici…
senza grati nta manica?..
Nò vvìti chi non avi mancu‘mpizzàti stiddi ‘i spiritu ufficiali nte spaddi?
Pippinu…rritònna chi pèti nto cèlu!…
Tu sì nu Spiritu semplici!…
Anzi, ‘u chiù semplici ‘i tutti ‘i Spiriti!
Non viti quannu voti ti fannu scupàri ‘i nuvulàti?
Quantu voti, gghiuvènnu o sutta ‘a nivi…
ti tocca fari a quaddìa all’Anciuleddì chi putiriunu cascàri du’ Paratisu..
quannu ggiocunu?
Pippinu ! Tu ancòra sì nu Spiritu ‘i prima nomina!…
Pi’ cciò…menu ‘i unu semplici!…
Mintattìllu nta testa!
PIPPINU: Parràti! Parràti!
‘A vostra è ttutta ‘nvidìa!
Ma rrìti bbònu…cu rrìti all’uttimu!
Intantu, a facci vostra…vaddàti chi bbedda famigghia chi haiu!
TIRÈSA: Ma, malanova mi havi ‘u Diavulu….
Comu mai vostru Patri non ttilèfuna!

E ppuru…i gittùni supra ‘a cascia cci misi!
Chistu, mi voli fari moriri ‘i crepacòri a mmìa!
GELSA: Matri… non vi preuccupàti!
Cci potti capìtàri occa contrattèmpu…
Pò essiri chi cc’èra sciopiru d’‘occa ccòsa!
SARINU: Si!..sciopiru ‘i treni!
Oh bbabba….ma chi stài dicènnu?
Ddà supra.. puru si ccumànna unu sulu…
tuttu funziona a ppuntu e vviggula e…
guai a ccu scarra!
Nenti sindacàti o Tribbunàli ‘i lavoru!
I Sbagghi si cunfessunu direttamenti ‘a San Petru…
e Cchistu, comu ‘u so’ nomi… è cchiù dduru ‘i ‘na petra!
GELSA: Mi facìsti scantàri Sarinu!
Puru si iò no’ haiu nenti mi mmi fazzu piddunàri!
SARINU: Si, cettu!…
Ch’ ‘u to’ Zzìtu t’‘a fài sempri… ricitànnu sulu puisìi!
GELSA: Mamma!…
‘U fài smettiri a Sarinu?
TIRÈSA: Ma figghitta?
Chi ddissi ‘i mali tò’ frati!
GELSA: Parra assài… e stà ffacènnu ‘a spia…a San Petru!
SARINU: Minchiùna!
Tuccài ‘u nebbu scummigghiatù ‘i me’ soru!
Vadda chi ddulùri ‘i mola!
TIRÈSA: Basta ora Sarinu!…
Avèmu cosi chiù ssèrii a ccùi pinzàri!
Vvi scuddàstu da’ tilifunàta ‘i vostru Patri chi non arriva?
PANCRAZIU: Pippinu?
Ma di quali tilifunàta stà pparrànnu tò’ mugghièri?
Sempri da infommàzioni assunti…mi rrisùtta….
chi ll’unicu telefunu chi cc’è ccà… è nto Paratisu!

PIPPINU: (Avvicinandosi a Tirèsa) Tirèsaaaaa!
Tirèsa Canariuuuuu!….
TIRÈSA: Oh, tutti muti!
Mi stà gghiamànnu vostru Patri!
PIPPINU: ‘Nchiùti a iaggia da’ bbuccaaaaa!….
Statti muta ‘na bbòna votaaaaaa!
‘U Capìstiiii!
TIRÈSA: Capiiiiia…!
Non pozzu parràri picchi non ssi ssuluuu…veruuu?
Si è ccòmu dicu Iò…dacci un cauci ‘e pèti du’ tauluuuu!
PIPPINU: Tirèsaaaa…s’‘i ‘na smetti ‘i parràri…
T’‘i dugnu sì un ccàuci ma… ann’autra pattiiii!….
Voi sapìri a unniiiiiii?
TIRÈSA: Non cc’‘innè bbisognuuuu!
‘U capìaaaaa!…..
PIPPINU: Benissimu!..Passu e nchiùtuuuu!
CALOGGIRU: Ma allùra?
Pi’ ddavèru cc’è occa ccòsa ‘i sutta!
Parra Pippinu!…. Non cci lassàri ‘o scuru!
PIPPINU: No! Chi non Vi lassu ‘o scuru!…
Ora Vvi ddumu ‘na cannìla!
Si Vvùi spiràti mi Vvi dicu occa ccosa…putìti moriri n’autra vota!
‘U ficutu vv’‘avìti a mmanciàri invèci…bbrutti spiriti ‘nvidiusi!

VOCE DEL GUARDIANO FUORI DAL PALCO

VOCE -Pippinuuuu! Pippinu Richiestaaaa…
Unni sì!….
Gran figghiu ‘i Raccumannàtu ‘i ferruuuu!…Rispunni!
PIPPINU: Ccà sugnu! Prisènti!
Chi ffìci ‘i mali st’avòta ?….
Iò ‘u friscalettu… no’sintìa friscàri!

E ccà cci sunnu puru ‘i Tistimòni ch’‘u ponnu diri!
PANCRAZIU: ‘I Tistimòni?…Pi’ nnùi pòi annàri ‘o funnu quannu Vòi!
Nui..non vistimu nenti e non ssapèmu nenti!
Cusì ‘nzigni!
VOCE - Pippinuuuu Richiestaaaaa…
hai mancu un ssicùnnu mi ti pigghi a valiggèddaaaa!….
Cc’è San Petru chi Tti stà spittannu davanti ‘a potta du’ paratisuuu!…..
CALOGGIRU: Comu? Comu?…
Chistu non vvàli!
Chista non è giustizia!(Suono di fischietto)
Sòna!… Sòna quantu voi!…
Carica anni!
Nui havi seculi e ssèculi chi ssèmu ccà.. all’acqua e ‘u ventu!
Non è giustu chi ll’uttimu ‘rruvàtu…
Diventa ‘u primu p’annàri ‘o Paratisu!…
San Petru ‘sta vòta sbagghiòi a raccumannàri a ‘stu spiriteddu! !(Suono di fischietto)
PIPPINU: Carricàmu! Ch’‘e bbeddu ‘stu friscalettu!
Cuntinua!..Cuntinua!…cusì nzigni!
E ora Spiritùseddi ‘i quattru soddi… si pimmittìti…
livativi a mmènzu ‘i pèti…
Pippinu Richiesta avi annàri in Turnèe …nto paratisu!…
Pi’ cciò..Bye Bye.. Baby..a canuscìti ‘sta canzùna veru?!
CALOGGIRU: Tenimi Pancraziu! Tenimi…
si nò va a ffinìri ch’‘a Cchistu… cci spaccu ‘i mussa! !(Suono di fischietto)
Puru ‘u friscalettu cci mancàva!….
Signùri chi rràggia chi haiu!
PIPPINU: (Cantando) Oh comu è bbèllu annàr …nto paratisu!…
Cu’ llà schina bbedda ritta e ttisu tisu!…
Vadda a cchiddi ddà …chi rristàru ccà!
(improvvisamente con la testa rivolta al cielo)
Oh San Gnusèppi e ttutti i santi…
unni sugnu?
Chi bbedda potta ‘nduràta!…chi LLùci!…. chi SSùli ddumàtu!….

Matri staiu ‘rruvànnu ‘o paratisu!
Cc’è ppuru San Petru avanti ‘a potta chi mm’‘aspetta!
Oh Tirisedda…quantu fusti bbràva!…
Appèna ‘ntràsu..Ti telefunu ‘i cussa!
VOCE – Pippinu Richiestaaaaa, in segnu di amicizia….
saluta pi’ ll’uttima vota i tò’ svinturàti Cumpagni…Spiriti du’ Puggatoriuuuu…!
PIPPINU: Comu nò!
Cettu!
Subbutu!
Cu’ immènzu piacìri….
Caloggiruuu! Pancraziuuuu!….
(Con un gesto del braccio) ‘A pigghiativi stu tritrolu e mmùrìti bballànnu…
Tèeee…Tèeeee….. rrumpitivi ‘u coddu….

(SUONO DI FISCHIETTO CONTINUO)….
E
(CHIUSURA DELLA PORTA DEL PARADISO)!

VOCE – Pippinuuuu..facìsti a fissarìa chiù rossa da’ tò’….
Vita Muttuariaaaa!…
Vicinu ò paratisu ogni ppiccàtu vali mmìlli anni…deci seculiiii!
E Ttù ora ‘a rritunnàri arrèti o puggatoriu mi nni scunti nautri….
Quattrumilaaaaa anni….Quaranta seculiiiii!
CALOGGGIRU: (Con un gesto del braccio) Pippinuuuu!
Tèeeee….!(Suono di fischietto)
Tèeeeee.. ! (Suono di fischietto)
Tèeeeee.. !(Suono di fischietto)
Sona! Sona!…
Tantu..‘sti seculi mi pigghiu cu’ ttutt’‘u còri!
PANCRAZIU: Puru iò Caloggiru:
Tèeee.. Pippìnu! (Suono di fischietto)
Tèeeee…Grandissimu figghiu ‘i Butt…!(Suono di fischietto…..in continuzione)….

GELSA: Matrìtta!…o niscìa paccia!…
‘O sentu ntall’aria un ssònu ‘nsistènti…comu…comu…
SARINU: Comu nu friscalettu Gelsa! Veru Matri?…
TIRÈSA: Si! Mi sembra propriu un friscàri i friscalettu!
SARINU: E cchi vvòli diri tuttu ‘stu sunàri sicunnu Vui Matri?
TIRÈSA: Mi vurrìa sbagghiari ma critu propriu chi non mi sbagghiu!
Vostru Patri….
Comu ‘o sò’ solitu ….
cci fici pattiri ‘i nèbbi e…scappàri a pacenzia puru e’…. SANTI!
PIPPINU: Tirèsaaaaaaa…..Aiutuuuuuu!…….
‘Sta vòta ‘a RACCUMANNAZIONI…
CECCACCÌLLA… direttamenti…. ‘o PATRATENUUUU!
TIRÈSA: Pippinuuuuu …non zzèntu chiuuuuuu!…..
Sugnu ggià in vvacànzaaaaa!....
Gelsa! Sarinu!….Amuninni a Ttaummìnaaaaa! (suono di campane)!

Non Prima, pirò, mi

RINGRAZIAMO
CON UN DOVEROSO INCHINO
TUTTO IL GENTILE PUBBLICO
QUI PRESENTE PER LA SUA PAZIENZA,
E CORTESIA NONCHÉ…
IL CALORE DIMOSTRATOCI !!