Tito Manlio Imperioso

di

Roberto Russo




(L’uomo è immobile al centro della scena. Indossa una giubba che potrebbe essere quella di una divisa.)

OTTAVIO Ie, pe’ mestiere, faccio ‘e domande. E, quann’ ‘e ffaccio, aggi’ a avè ‘e risposte. Nun putite fa finta ‘e niente annanz’ all’Autorità e alla Legge!
Ie, pe’ mestiere, faccio ‘e domande…e mò voglio ‘e risposte! Se voi conoscete i vostri diritti, ie cunosco i miei doveri, ma pure i poteri!
Ricostruiamo i fatti, come da verbale….
Chello piezz’ ‘e Domiziana…fra Baia Verde e Villaggio Coppola.. ‘A via d’ ‘e puttane…Cu ‘e nere, nu lavoro ‘e capa vene 25 Euro, ma, ‘e zzoccole, non sono di nostra competenza. Nuie facimm’ ‘e poste ‘e blocco. Ie so’ sovrintendente di P.S.. Curci Ottavio. E stu nomme nun se scorda pecchè pare nu nomme storico! E, difatti, m’ ‘o mettette patemo pecchè teneva na passione pe’ Roma antica …“Ottavio”! Pur’ ‘a Domiziana è na via storica ma, ‘a sera del 16 Agosto ‘e cinch’anne fa, nun ce steva Giulio Cesare e, nemmanco, Ottaviano Augusto…Ce stev’ie, mmiez’ a puttane e muzzarellare, a ffà rispettare le regole…‘O ffaccio pe’ vvuie e pe’ chille ca, comm’a vuie, vonno campà quiete…Ma, quanno te truove mmiez’ ‘a sfaccimma d’ ‘a genta, tuosseche, bruciate …‘a scumma…allora capisci che il bene delle perzone “come si deve”, sta pure più sopra del tuo bene…..Accussì ‘a penzava pure patemo. ‘E Roma antica ce piaceva quel console…mò nun me ven’ ‘o nomme…chillo ca, pe fa rispettà l’ordine nell’esercito, pijaie na decisione…difficile! Proprio comm’a mme…Pecchè ie ‘o ssaccio: vuie, vulite vedè ‘e risultate! Vulite cammenà tranquille! Nisciuno v’add’ a scassà ‘o cazzo cu scippe e rapine! Ie so’ sovrintendente ‘e P.S., e pe’ fa rispettà le regole vostre, piglio 1100 Euro al mese..Pe’ carità! Nun me lamento, me piace, ie, alle regole, ce credo! Chello piezz’ ‘e Domiziana pur’ a mme me fa schifo. Comme me fanno schifo ‘e zzoccole ca “doppo” nun se sciacqueno manc’ ‘a vocca, e stanno già pronte pe’ n’ato…Ma, v’ho detto, noi facciamo i posti di blocco. Ce sta sempe chillo c’ ‘a patente scaduta, chill’ato ca se crede ‘e stà a Indianapolis, e noi interveniamo: multa, ritiro ‘e patente e, ‘e vvote, l’arresto….Il 16 Agosto di cinque anni fa ero di pattuglia con l’agente scelto Marcucci Giulia…faceva nu caver’ ‘e pazze! Figurateve ca m’ero miso a meze maniche e tenev’ ‘a pistola int’ ‘e cazune. All’intrasatta l’autovelox, ca steva 500 metri cchiù a llà, ci dette il segnale: 150 chilometri all’ora!

“Oillann’ ‘o figli’ ‘e mappina! Vene comm’a nu fulmine!”

La collega ‘o facette signo, cacciaie ‘a paletta e chillo, pe’ tutta risposta, primma rallentaie, po’ dette nu colp’ ‘e gas e, n’ato ppoco, ‘a mettev’ ‘asotto!
Vuie me putite capì: proprio in quei momenti vale la regola…Se tu stai in difetto, e lo sai! E mi vedi! E io ti faccio segno! Tu, t’he a fermà!! Se non ti fermi, ie me ‘ncazzo! Mò, si teng’ ‘a machina che me lo permette, te veng’ a pijà ma, si nunn’ ‘a tengo, int’ a na manera, la regola, te lo devo far capire! Non sono cose che uno ci penza..vengono “accussì”..pecchè ‘e ttien’ a dinto! Pecchè accussì se fa!
‘A pistola me deva fastidio, me pesava int’ ‘e cazune, ‘mmano, invece, era leggera, pure il calcio era fresco….
Accussì se fa! Si toglie la sicura, si prende la mira…e se spara!
Un colpo solo. Avevo mirato più in alto, ma tenev’ ‘e mmane sudate, me sciuliaie….
Intanto, chillo, s’era fermato 30 – 35 metri cchiù annanza…
“ S’è cacato sotto!”

Facette na corza, arapette ‘a porta, e vedette doie muccusille…18 – 19 anne, cu na faccia janca…!

“Scennite!”

Uno, po’ spavento, me steva vommecanno ‘ncuollo. Chill’ato abbiaie
a chiavà ‘a capa ‘nfacce ‘o finestrino…

“Mò te faie venì na mossa!? Scurnacchiato!”

Era notte ma, comm’a sempe, avette l’impressione di conoscerli già. Sti guagliune , in fondo, s’assumeglieno tutte quante: ‘o recchino, ‘e capille c’ ‘o ppoco ‘e gel…Fann’e facce toste, m’abbasta ca vecono na divisa, e se metton’a chiagnere comm’ ‘e criature! Apparteneno a famiglie ‘e merda, o teneno nu pate ca ce dà troppe denare…‘a solita storia…Un’ ‘e chille ddoie allucaie:

“Nun se move! Nun se move cchiù!”

Ce ne steveno ati ddoie addereto…

“Ascite! Mall’anema ‘e chi v’è mmuorto!”

Scennette ‘o primmo. Me guardaie comme se po’ guardà nu fantasma, cu ll’uocchie a fora…

“Nun se move! ‘O ssaje ch’he fatto!?”

E comme se permetteva!?

“Neh, nennì! Mò me daie ‘o “tu”!? Avvesemo magnato int’ ‘o stesso piatto!?”

‘O compagno lloro facev’ ‘o strunzo pe’ nun ghì a ‘a guerra…

“Scinne! ‘A fess’ ‘e mammeta, scinne!”

….‘E guagliune s’hann’a trattà accussì: parlanno c’ ‘a lengua lloro. Pur’ie so’ pate, ‘o ssaccio…

“C’he rutt’ ‘e ppalle! T’aggio venì a pijà!?”

Facette ‘o giro d’ ‘a machina e, sul lunotto posteriore, vedette nu buco piccerillo, cu na ragnatel’ ‘e vetre scassate attuorno. Arapette ‘a porta. ‘O guaglione steva stiso, c’ ‘a faccia asotto…

“Sta fatto, jammo! Dateme na mano p’ ‘o tirà…”

…Passajeno primma ‘e cosce, po’ ‘a schiena…era notte, ma, adderet’ ‘a capa, vedette na macchiulella, ‘a tuccaie, e me ‘nguacchiaie ‘e sanghe….
(Trasale)
Comm’è strana ‘a capa! Parlann’ ‘e nu fatto, me ne so’ arricurdato n’ato! ‘O nomme d’ ‘o console romano ca, pe’ salvà a repubblica, facette accidere ‘e pariente…Tito Manlio Imperioso! E’ brutto quanno nun ve vene nu nomme…. “Tito Manlio Imperioso”!
….Voi potete pensare quello che volete ma da quando ‘o vutaimo, e vedette c’ ‘o guaglione era muorto, da allora, me faccio sempe ‘a stessa domanda…e ogge, v’ ‘a faccio a vuie…A voi, ca nun vulite vedè ‘e ccose brutte pe’ mmiez’ ‘a via, pecchè, ‘o ssapite, pe’ mestiere, faccio ‘e domande…: se la regola, ie, gliel’ ho imparata, pecchè isso!?
Pecchè proprio mio figlio, chella sera ‘e cinch’anne fa, nun l’ha rispettata!?
Quaccheduno, me sape risponnere….!?


B U I O